“Ermənistanın siyasi hoqqabazlıqları heç nəyi dəyişməyəcək” – Elman Nəsirov

access_time22-10-2022, 14:04 visibility23 categoryXəbərlər

Xəbər verdiyimiz kimi, Ermənistan xarici işlər naziri Ararat Mirzoyan ölkəsinin ATƏT-ə Azərbaycanla sərhədə missiya göndərməsi üçün müraciət etdiyini açıqlamışdı. Rəsmi İrəvanın müraciətinə oktyabrın 19-da təşkilatdan cavab gəldi və oktyabrın 21-27-də Ermənistanın sərhəd ərazilərinə müşahidəçilərin göndəriləcəyi bildirildi. 

Bəs, ATƏT müşahidəçilərinin regiona gəlişi hansı məqsədlərə xidmət edir? 

Mövzu ilə bağlı açıqlama verən millət vəkili Elman Nəsirov qeyd edib ki, Ermənistan hərbi-siyasi rəhbərliyi daha hansı siyasi hoqqabazlığa əl atacağını bilmir: 

“Bildiyiniz kimi, Praqa danışıqlarının gedişatında onlar Avropa İttifaqı missiyasının Azərbaycan-Ermənistan sərhədinə gəlməsini təklif etdilər. Azərbaycan Prezidenti isə prinsipial şəkildə bildirdi ki, onlar gələ bilərlər, lakin Azərbaycana gəlmələrinə ehtiyac yoxdur. Onlar KTMT-nin nəzarət zonasına gəlsinlər və orada öz missiyalarını yerinə yetirsinlər. Bizim ərazimizdə belə bir missiyaya ehtiyacımız yoxdur.  
 

Lakin ATƏT missiyaları həmin vaxt məruzə etsələr də, bunun Ermənistan üçün heç bir təsir elementlərini hiss etmədik. Belə olan halda, haqlı olaraq Azərbaycan ictimaiyyətinin ATƏT-in Minsk qrupuna heç bir etimadı qalmadı. Lakin nəzərə almalıyıq ki, Minsk qrupu da müstəqil qurum deyil, məhz ATƏT-in tərkibinə daxildir. ATƏT isə öz dişsiz siyasəti ilə özünə olan inam və etibara böyük zərbə vurub. Günah da özlərindədir”. 

Elman Nəsirovun sözlərinə görə, Ermənistanın siyasi hoqqabazlıqları heç nəyi dəyişməyəcək: 

“Azərbaycanın prinsipial mövqeyi, güclü lideri və ordusu var. Ermənistan tərəfi bilməlidir ki, Azərbaycanın da səbrinin həddi var. Bizim mövqeyimiz bəllidir və arxadan zərbə vurmaq istəyənlərə cavabımız adekvat olacaq. Biz sülh istəyirik, lakin müharibəyə də hazırıq. 

Biz Ermənistanın təxribatına hazırıq. Cənab Prezidentin də qeyd etdiyi kimi, biz hətta Ermənistanla sülh müqaviləsi imzalasaq belə, ehtiyatımızı əldən verməməliyik. Biz məkrli düşmənlə üz-üzəyik və onun havadarları var. Yəni sülh müqaviləsinin özü belə bizi təxribatlardan 100 faiz qorumağa təminat vermir. Bunun üçün də hər zaman güclü olmalıyıq. Çünki güclü olduqda səninlə hesablaşırlar”.
Facebook'da Paylaş Telegram'da Paylaş Twitter'da Paylaş Whatsapp'da Paylaş